5 nov. 2013

O PP de O Barco solicita que o Concello barquense promova convenios de colaboración coas grandes e medianas superficies para a doazón continuada e permanente de produtos alimenticios


  • Os populares veñen de rexistrar esta mañá unha moción ao respecto para o seu debate e aprobación no pleno municipal, solicitando tamén a posta en marcha dunha campaña de sensibilización e información para que se sumen todos os supermercados ou comercios que así o desexen


O Barco, 04 de novembro de 2013.- O Grupo Municipal do Partido Popular en O Barco de Valdeorras ven de rexistrar esta mañá unha moción, para o seu debate e posterior aprobación no pleno municipal, que solicita que o Concello de O Barco promova a sinatura de convenios de colaboración coas grandes e medianas superficies comerciais da vila para a doazón continuada e permanente de produtos alimenticios.


Ademáis, os populares tamén solicitan que a Concellería de Asuntos Sociais, en colaboración coa Concellería de Comercio, poña en marcha unha campaña de sensibilización e información para que se sumen todos os supermercados ou comercios que así o desexen.


Segundo explica o portavoz dos populares, Moisés Blanco, “con esta proposta, queremos que a Concellería de Asuntos Sociais incentive as áreas comerciais do Barco para que doen produtos alimenticios, en moitos casos excedentes en bo estado que son desaproveitados, e a través das propias asociacións benéficas e coa colaboración institucional do Concello poidan distribuírse diariamente ou semanalmente entre as familias máis necesitadas. Do mesmo xeito, a Concellería podería crear o distintivo de “Entidade Solidaria”, para que o poñan nas súas instalacións e o Concello publicitar na súa web a lista de colaboradores que participen nesta campaña”.


Na exposición de motivos da moción, os populares de O Barco sinalan que:

Segundo os últimos datos facilitados por algunhas das entidades máis representativas de carácter benéfico da nosa comarca, no presente ano, lévanse realizadas en O Barco preto de 5.000 atencións, chegando a máis de 600 persoas con necesidades. Deste xeito, tal e como afirmaron públicamente os responsables de Cruz Vermella e Cáritas a súa labor asistencial incrementouse nos últimos tempos por mor das dificultades económicas polas que atravesa a nosa sociedade, e en particular moitas familias que acoden reiteradamente a este tipo de axudas.

Os veciños e veciñas de O Barco teñen demostrado a súa xenerosidade a través da súa participación en diferentes proxectos sociais como actuacións, concertos, cenas, mercadillos, sorteos etc... onde os barquenses amosan en cada convocatoria o seu corazón solidario.
Ademais do xusto recoñecemento veciñal e o papel fundamental das distintas institucións ou asociacións que neste eido levan traballando moitos anos, tamén se teñen sumado todo tipo de colectivos, entidades e centros educativos que con cada actividade conseguen periodicamente unha gran recolección de roupa, comida, medicinas, xoguetes ou cartos para poder afrontar os gastos básicos do día a día de calquera fogar.

Dende o grupo popular somos conscientes que, malia que a situación comeza a mellorar, aínda hai e seguirá habendo moitas familias que seguirán atravesando serias dificultades para poder levar as súas casas algo tan elemental como son os alimentos e os produtos de primeira necesidade.

Por iso, consideramos que desde o Concello sería moi positivo impulsar a sinatura de “Convenios de Colaboración” coas grandes e medianas superficies comerciais para que de xeito continuo e permanente poidan doar unha importante cantidade de alimentos”.

No hay comentarios:

Publicar un comentario