19 jun. 2014

O PARLAMENTO GALEGO APROBA, A PROPOSTA DO GRUPO POPULAR, INSTAR Á XUNTA A POÑER EN MARCHA UN PLAN DE PROMOCIÓN DO PARQUE NATURAL DA SERRA DA ENCIÑA DA LASTRA


Este enclave presenta un gran potencial de recursos naturais que o sitúan como un lugar único e especial para gozar dunha beleza natural en Galicia”, destacou o deputado Moisés Blanco



O PARLAMENTO GALEGO APROBA, A PROPOSTA DO GRUPO POPULAR, INSTAR Á XUNTA A POÑER EN MARCHA UN PLAN DE PROMOCIÓN DO PARQUE NATURAL DA SERRA DA ENCIÑA DA LASTRA

  • Conta coa declaración de Parque Natural e está incluída na Rede Natura 2000

Santiago, 19 de xuño de 2014.- O Parlamento de Galicia aprobou hoxe unha proposición non de lei, presentada polo deputado do Grupo Popular Moisés Blanco, a través da que se insta á Xunta de Galicia á posta en marcha dun Plan de Promoción do Parque Natural da Serra de Enciña da Lastra do concello de Rubiá de Valdeorras. Ademais, e logo dunha transacción co BNG, aprobouse solicitar a elaboración do preceptivo plan reitor de uso e xestión, que permita unha política integral de conservación, preservación e mellora das condicións naturais deste parque natural.
Moisés Blanco afirmou que a Serra da Enciña da Lastra, que conta coa declaración de Parque Natural de Galicia e está incluída na Rede Natura 2000, presenta “un gran potencial de recursos naturais que o sitúan como un lugar único e especial para gozar dunha beleza natural na Comunidade galega”.

LOITA CONTRA OS INCENDIOS
Por este motivo, sinalou que “precisa dunha maior promoción a través da posta en marcha de accións que promovan máis ou seu uso público, que permitan mellorar os hábitats forestais e medidas de prevención contra os lumes, entre outras”.

Neste sentido, Blanco condenou “os incendios sufridos en menos de dous meses no contorno deste parque natural e agradeceu o traballo feito polos medios de extinción. “Esta situación puxo de manifesto a necesidade de seguir traballando en labores de prevención, así como na dotación a esta zona dos recursos necesarios para unha rápida e eficaz resposta dos servizos contraincendios forestais”, anotou.
A Serra da Enciña da Lastra está localizada no concello valdeorrés de Rubiá, ao nordeste da provincia de Ourense. Cunha superficie de 3.151,67 hectáreas e unha altitude media de 684 metros, este val está conformado de pedra calcaria, con pendentes pronunciadas e cantís nos que se instalan bosques mediterráneos. Así, destaca o potencial turístico desta zona, na que se sitúan Pena Trevinca, O Teixadal, a Vía Nova, o Camiño de Inverno ou, incluso, As Médulas na comarca do Bierzo.
 
O deputado popular salientou, ademais, o “especial interese faunístico desta serra, en particular polas súas poboacións de aves rapaces, entre as que merece unha mención especial a presenza da aguia real e o falcón peregrino”. Así mesmo, indicou que a abundancia de covas propicia a existencia de numerosas colonias de morcegos, sendo estas as máis importantes de Galicia.

Por último, Blanco fixo referencia á “peculiar flora da Enciña da Lastra, xa que ten certas características mediterráneas cos seus bosques de aciñeiras, castaños, prados perfumados co aroma do tomiño silvestre e máis de 25 especies de orquídeas.

No hay comentarios:

Publicar un comentario