14 jun. 2013

O PPDEG REITERA QUE A XUNTA PROMOCIONA E IMPULSA OS CONTRATOS HOMOLOGADOS NO SECTOR VITIVINÍCOLA “AÍNDA QUE NON OS PODE IMPOÑER”


O deputado Moisés Blanco Paradelo reiterou hoxe na Comisión de Agricultura do Parlamento a aposta da Administración autonómica pola existencia de contratos-tipo para achegar transparencia e estabilidade ao sector


Santiago, 14 de xuño de 2013.- O deputado do PPdeG Moisés Blanco Paradelo reiterou hoxe no seo da Comisión de Agricultura do Parlamento que a Xunta promociona e impulsa os contratos homologados no sector vitivinícola “que achegan transparencia e estabilidade ao sector e son bos tanto para produtores como para as industrias xa que lles permiten ter unhas garantías, aínda que a Administración autonómica non os pode impoñer xa que é necesario deixar traballar con liberdade as denominacións de orixe”.


O deputado popular puxo como exemplos desta defensa deste tipo de contratos pola Administración a priorización das axudas ás empresas que os asinan nos sectores nos que existen e as múltiples reunións que propiciou a Consellería de Medio Rural e do Mar entre organizacións agrarias e representantes do sector nos que existen.


Do papel da Consellería na consecución destes acordos se traduce a súa promoción e impulso, pero obviamente non pode impoñelos se algunha das partes non está de acordo, por iso, na lexislatura pasada houbo denominacións de orixe nas que os representantes do sector asinaron acordos sobre estes contratos para a súa homologación pola consellería” segundo Moisés Blanco.


Para o deputado do PPdeG é necesario ter claro que estes contratos “non poden ter como fin fundamental fixar o prezo mínimo de compra, senón que pode e debe servir para dar garantías ao produtor de recollida da colleita e dos prazos e condicións nos que vai cobrar pero, en principio, o prezo debe ser algo que libremente pacten en cada contrato o produtor e a adega”.


Ao respecto da falta de pago das uvas que se adebedan ou que se produciron nalgunhas denominacións de orixe, Moisés Blanco Paradelo indicou na súa intervención que é necesario diferenciar dúas situacións. Por unha banda se a falta de pago se refire a transaccións comerciais realizadas ao abeiro dun contrato homologado “os viticultores poden poñelo de manifesto perante a comisión de seguimento do contrato e intentar resolvelo nesa instancia ou senón pode acudir á arbitraxe da Consellería” e cando o impago se corresponde con transaccións realizadas á marxe do contrato “a Consellería non ten un instrumento legal para actuar polo que o viticultor tería que, se o considera oportuno, acudir á vía xudicial para reclamar o pagamento”.

No hay comentarios:

Publicar un comentario