MOISÉS BLANCO REUNÍUSE CON ROSA QUINTANA PARA ABORDAR DIVERSOS TEMAS DO EIDO FORESTAL E SOBRE PREVENCIÓN DE INCENDIOS

O parlamentario trasladou á conselleira a importancia de impulsar o proxecto de posta en valor do monte de Valdeorras e, en concreto, o relativo á implantación e mellora da xestión das plantacións de castiñeiros de froito

MOISÉS BLANCO REUNÍUSE CON ROSA QUINTANA PARA ABORDAR DIVERSOS TEMAS DO EIDO FORESTAL E SOBRE PREVENCIÓN DE INCENDIOS

• Desde a Consellería do Medio Rural e do Mar aseguran que en menos de dez minutos o helicóptero contra incendios podería estar sobrevoando a comarca de Valdeorras si se precisase da súa intervención para a extinción dun lume
• 
  Lamenta que o alcalde socialista do Barco critique a posta en marcha das brigadas municipais contra incendios e despois acabe solicitando o convenio para poñelas en marcha
  

Santiago, 26 de xuño de 2013.- O deputado do Grupo Parlamentario Popular Moisés Blanco Paradelo mantivo hoxe unha reunión coa conselleira do Medio Rural e do Mar, Rosa Quintana, na que abordaron unha serie de temas relacionados co eido forestal e no ámbito da prevención e extinción de incendios.

O parlamentario trasladou a importancia de impulsar o proxecto de posta en valor do monte de Valdeorras e, en concreto, o relativo á implantación e mellora da xestión das plantacións de castiñeiros de froito. A titular do departamento autonómico de Medio Rural ratificou o compromiso e vontade do Goberno galego de desenvolver nesta zona este proxecto, que terá un carácter experimental e que serviría para comprobar os resultados desta estratexia para a multiplicación do valor económico nos montes.

Moisés Blanco insistiu que unha vez que quedou claro o compromiso da Consellería corresponde agora ao Concello poñer a disposición os terreos de monte e plantacións forestais que permitan dar arranque a este proxecto tan importante, e insiste en que a súa execución redundará tanto na diversificación económica forestal como na mellora das políticas preventivas contra incendios.

HELICÓPTERO CONTRAINCENDIOS

Moisés Blanco tamén coñeceu de primeira man o dispositivo previsto para a campaña estival contra incendios e destacou como a distribución dos helicópteros contraincendios responde a criterios exclusivamente técnicos e estratéxicos.

“Que non exista un helicóptero as 24 horas na base de Valdeorras non quere dicir que non estea plenamente operativo e disposto para participar de xeito inmediato nun operativo de extinción que se produza nesta comarca. De feito os helicópteros non pertencen a un ámbito comarcal concreto, senón que participan alí onde fai falla, como se demostrou no gran despregue de medios que tivo lugar no incendio do Barco, que foi o que máis número de medios aéreos congregou ao longo de todo o último ano”.

Moisés Blanco explicou que un helicóptero podería tardar arredor de dez minutos en percorrer os aproximadamente 30 quilómetros que separan a comarca do Barco da base permanente sita en San Xoán de Río. “En menos de dez minutos estaría sobrevoando a zona, si se precisa da súa intervención”

A Xunta confirmou ao deputado que todos os medios contraincendios forman parte dunha planificación unitaria e responden a un mando único polo que a administración pode trasladalos a unha ou outra comarca, empregando todas as bases alternativas, segundo se precise, garantindo as ratios de resposta a cobertura de todo o territorio conforme a criterios técnicos e avaliación de riscos.

BRIGADAS FORESTAIS

Moisés Blanco quixo aproveitar tamén para pedir ao alcalde socialista do Barco que faga o traballo que ten pendente neste eido en vez de dedicarse a criticar por criticar. Nesa liña lembrou a incoherencia do rexedor cando cuestiona a creación das brigadas municipais contra incendios e despois acaba solicitando o convenio para poñelas en marcha.

O deputado popular lembroulle ao rexedor que os concellos teñen plenas competencias no ámbito da prevención e loita contra os lumes e, de feito, as medidas concretas que ten previsto impulsar a Xunta de Galicia no ámbito da coordinación e apoio aos concellos, de cara a súa involucración e implicación activa na loita contra incendios forestais enmárcanse na Lei 3/2007, do 9 de abril, de prevención e defensa contra os incendios forestais de Galicia, modificada pola Lei 7/2012 do 28 de xuño de montes (artigos 8 e 59)