MOISÉS BLANCO SOLICITOU HOXE A PATRIMONIO A AXILIZACIÓN DOS TRÁMITES PARA CONQUERIR A DECLARACIÓN OFICIAL DO CAMIÑO DE INVERNO

O deputado do PPdeG reuníuse coa directora xeral do Patrimonio Cultural, Mª Carmen Martínez Ínsua, quen lle confirmou que o estudo sobre historicidade do Camiño “xa está en fase de análise e supervisión polos técnicos da Dirección Xeral”

MOISÉS BLANCO SOLICITOU HOXE A PATRIMONIO A AXILIZACIÓN DOS TRÁMITES PARA CONQUERIR A DECLARACIÓN OFICIAL DO CAMIÑO DE INVERNO

• Destacou os esforzos realizados polas distintas asociacións de amigos do Camiño de Inverno que “supuxeron un impulso moi importante para lograr a oficialidade” así como a labor de alcaldes e alcaldesas, entidades culturais como o Instituto de Estudos Valdeorreses e persoeiros relevantes como Ramón García ou Isidro García Tato “que aportaron un importante traballo en toda a fase de documentación”

Santiago, 7 de febreiro de 2013.- O deputado do PPdeG Moisés Blanco Paradelo solicitou hoxe a responsables da Xunta de Galicia a “axilización da tramitación para conquerir a declaración oficial do Camiño de Inverno”. Blanco Paradelo reuníuse coa directora xeral do Patrimonio Cultural da Xunta de Galicia, Mª Carmen Martínez Ínsua, quen lle confirmou que o estudo sobre a historicidade do Camiño, entregado recentemente, “xa está en fase de análise e supervisión polos técnicos da Consellería de Cultura”.

O deputado popular indicou que “somos conscientes dos esforzos que se están a facer, xa que se leva tempo traballando no proceso de declaración da oficialidade e como requisito establecido na Lei de Protección dos Camiños de Santiago foi encargado o estudio específico que documente a ruta histórica e agora solicitamos que eses procedementos técnicos, legais e administrativos necesarios para que así poida ser se realicen no menor prazo posible”.

Moisés Blanco destacou a implicación decidida das distintas asociacións de amigos do Camiño de Inverno que supuxeron “un impulso importante para lograr a oficialidade” así como a labor dos distintos alcaldes e alcaldesas, entidades culturais como o Instituto de Estudos Valdeorreses e persoeiros relevantes como Ramón García ou Isidro García Tato “que aportaron un importante traballo en toda a fase de documentación”.