O GRUPO POPULAR SE INTERESA NO PARLAMENTO POLO NOVO EQUIPAMENTO PARA O HOSPITAL COMARCAL DE VALDEORRAS

O deputado popular Moisés Blanco presentou unha iniciativa solicitando a data na que contará co novo TAC e o orzamento destinado a esta nova adquisición

O GRUPO POPULAR SE INTERESA NO PARLAMENTO POLO NOVO EQUIPAMENTO PARA O HOSPITAL COMARCAL DE VALDEORRAS

• Avogou porque se siga mellorando o equipamento e que pronto se poida ampliar a carteira de servizos “que permitan mellorar a oferta asistencial, altamente especializada, nun centro sanitario próximo mentres se mantén a desexable coordinación co servizo médico de referencia”

• Moisés Blanco recordou que no mes de xullo o Hospital ampliou os seus servizos con novas consultas de Endocrinoloxía “o que permitirá aos seus pacientes acudir directamente ao Barco, evitando traslados a Ourense”

Santiago, 20 de agosto de 2013.- O deputado do Grupo Popular Moisés Blanco Paradelo ven de presentar no Parlamento de Galicia unha iniciativa na que se interesa polo novo equipamento para o Hospital Comarcal de Valdeorras solicitando a data na que contará co novo TAC e cal será o orzamento destinado a esta nova adquisición.

Moisés Blanco recordou que “de todos é sabido a urxente necesidade que o Hospital ten de poder contar cun novo TAC, e así o confirmou as declaracións do Presidente da Xunta ao finalizar o Consello do pasado 24 de xullo no que indicou que Valdeorras centraría unha das tres primeiras actuacións dunha inversión de 80 millóns de euros para renovar a dotación tecnolóxica de centros sanitarios no Servizo Galego de Saúde”.

O deputado popular recordou que no mes de xullo o Hospital Comarcal ampliou a súa carteira de servizos con novas consultas de Endocrinoloxía, “o que permitirá aos seus pacientes acudir directamente ao Barco, evitando traslados a Ourense para ser atendidos”. Esta nova especialidade engádense as xa incorporadas o pasado ano de Neuroloxía e Dixestivo, xunto á ampliación de Cardioloxía e “este importante salto cualitativo na oferta de servizos é posible grazas á maior coordinación entre a rede hospitalaria e de Atención Primaria do Servizo Galego de Saúde en Ourense” segundo Moisés Blanco.

O deputado do PPdeG avoga porque se siga mellorando o equipamento e que pronto se poida ampliar a carteira de servizos “que permitan mellorar a oferta asistencial, altamente especializada, nun centro sanitario próximo mentres se mantén a desexable coordinación co servizo médico de referencia, potenciando o traballo en equipo, a oferta de facultativos e a alta especialización”. “A mellora no equipamento a a ampliación de servizos no Hospital repercutirán moi positivamente na mellora da calidade asistencial dos pacientes que é o que verdadeiramente importa” segundo Moisés Blanco.