MOISÉS BLANCO PRESENTA UNHA PROPOSTA NO PARLAMENTO PARA QUE FOMENTO MANTEÑA OS PREZOS DO TREN-EXPRÉS EN TODAS AS VIAXES ENTRE AS ESTACIÓNS DE VALDEORRAS E OURENSE

A remodelación de horarios feita por RENFE deixou á comarca de Valdeorras sen a primeira conexión diaria por tren con Ourense

MOISÉS BLANCO PRESENTA UNHA PROPOSTA NO PARLAMENTO PARA QUE FOMENTO MANTEÑA OS PREZOS DO TREN-EXPRÉS EN TODAS AS VIAXES ENTRE AS ESTACIÓNS DE VALDEORRAS E OURENSE

• A alternativa existente é o ‘Tren-Hotel’ das 7 da mañá, pero a un prezo de billete superior aos 20 euros, fronte aos 8 euros que se pagaban anteriormente

• O ‘Tren-Exprés’ parte ás 10 horas de Valdeorras e ten un prezo de 8,95 euros

Santiago, 8 de decembro de 2013.- O deputado do Grupo Popular Moisés Blanco presentou unha proposición non de lei no Parlamento galego a través da que se solicita ao Ministerio de Fomento que manteña os prezos do Tren-Exprés en todas as viaxes desde as estacións de O Barco ou A Rúa na comarca de Valdeorras ata Ourense para facilitar o transporte dos veciños desta comarca ata a capital ourensá.

Moisés Blanco recorda que a remodelación de horarios nos trens de RENFE propiciou que os veciños da comarca de Valdeorras quedaran sen a primeira conexión diaria coa capital da provincia, que lles permitía estar na cidade de Ourense arredor das 9 da mañá por un prezo da viaxe de 8 euros.

ALTERNATIVAS

“A alternativa que temos os veciños de Valdeorras é o Tren-Hotel procedente de Barcelona, con parada en O Barco e A Rúa ás 7.10 e 7.30 horas, respectivamente, pero cun custe moi superior aos 20 euros”, explica o deputado popular. Esta situación está a xerar moitas queixas entre os usuarios polo incremento do prezo da viaxe.

O deputado popular apunta que “existe outra opción máis axeitada economicamente, pero hai que esperar ata as 10 horas para coller o Tren-Exprés a un prezo de 8,95 euros, pero co inconveniente de chegar a Ourense pasadas as 12 da mañá”. “Este horario dificulta considerablemente a posibilidade de que os veciños de Valdeorras que se desprazan á capital provincial poidan levar a cabo trámites administrativos, sanitarios ou doutro tipo que non poden realizar na comarca valdeorresa”, sinalou.

Fronte a esta situación, Moisés Blanco solicita do Ministerio de Fomento que manteña os prezos dos billetes do Tren-Exprés para todas as conexións ferroviarias entre a comarca de Valdeorras e a cidade de Ourense, unha demanda que xa foi realizada desde a Asociación de Empresarios de Valdeorras ou polo Pleno do Concello de A Rúa.