MOISÉS BLANCO ABORDA CO CONSELLEIRO DE ECONOMÍA E INDUSTRIA MEDIDAS DE IMPULSO AO SECTOR DA LOUSA

Francisco Conde adiantoulle ao deputado valdeorrés que mañá sairá publicada no DOG unha nova edición do Plan Renove de Lousa, dotada con 200.000 euros

• Na reunión tamén se tratou o impulso á internacionalización do sector e as medidas contra o po de sílice

Santiago, 12 de marzo de 2015.- O deputado do Grupo Popular Moisés Blanco mantivo un encontro co conselleiro de Economía e Industria, Francisco Conde, no que se interesou por distintos temas de interese para a comarca valdeorresa, con especial atención ao sector da lousa do que dependen laboralmente moitas familias desta zona.

Neste sentido, o conselleiro adiantoulle ao deputado popular que mañá sairá no Diario Oficial de Galicia unha nova edición do Plan Renove de Lousa, que mantén unha dotación de 200.000 euros para impulsar a renovación de cubertas de edificios de vivendas empregando este material. Contribúese así á dinamización deste sector tan importante para a comarca de Valdeorras, impulsando a industria da construción a través do incremento da demanda e a instalación de lousa.

BEN ACOLLIDO POLO SECTOR

Moisés Blanco salientou a importancia da renovación deste plan “que sempre foi ben acollido polo sector dos colocadores de lousa e que agora poderán volver a beneficiarse do impulso que estas axudas supoñen para a realización de obras de mellora nas cubertas en toda Galicia”.

Ademais, na reunión abordáronse as posibilidades que ofrecen ao sector as liñas de apoio do Igape, de xeito especial no ámbito da internacionalización. Neste sentido, o conselleiro informou a Blanco de que a pedra natural centrará un dos plans operativos sectoriais específicos para as áreas estratéxicas da economía galega que se vai poñer en marcha no marco da Estratexia de Internacionalización da Empresa Galega 2020 que a Xunta vén de activar.

PROMOCIÓN E INTERNACIONALIZACIÓN

O deputado popular trasladoulle ao conselleiro “a importancia de poñer en marcha medidas para axudar á promoción e internacionalización deste sector, de xeito que poida mellorar a súa competitividade e unha maior cota de mercado”

Do mesmo xeito, Moisés Blanco e Francisco Conde trataron as diferentes actuacións que se están a impulsar desde a Consellería en colaboración co sector para a mellora das condicións dos traballadores reducindo a súa exposición ao po de sílice, procurando medidas de prevención para a eliminación dos riscos mediante novas tecnoloxías, mellorando as xa existentes e introducindo cambios nos procesos produtivos.